انت زائر في الموقع، لتتمتع بجميع مزايا الموقع سجل كلاعب جديد في الموقع. بامكانك التسجيل باستخدام فيسبوك

لقاء مع بطل مصر د/ باسم امين

https://fb.watch/h_GSNYRKWj/


•• باسم أمين | The Egyptian king's Gambit ••

باسم أمين هو شاب مصري من طنطا اتعلق شغفه بلعبة الشطرنج من وهو عنده ٥ سنين وظهرت فيه موهبة اكتشفها والدة اللي كان محب للعبة الشطرنج واللي أول ما اكتشف الموهبة في باسم عمل علي تنميتها وجابله أفضل المدربين في مصر عشان يشتغلوا علي موهبته ويدربوه يوصل للأفضل والافضل وفعلا وهو في سن ال٧ سنين شارك في اول بطولة له وهي بطولة الجمهورية اللي حقق فيها المركز التاني ومن هنا كانت بداية ميلاد بطل وأسطورة مصرية في لعبة الشطرنج!...تعلوا نحكيلكم التفاصيل

🔴 بين الطب وعشقه للشطرنج

استمر احتراف باسم واستمر مستواه في الصعود والتحسن وبدأ يحقق البطولات بطولة ورا التانية ويعلي تصنيفة العالمي في ترتيب لاعبين الشطرنج وفي الثانوية العامة كان باسم طالب نابغة قدر يحصل علي 104% في الثانوية العامة (97% + 7% حافز رياضي) دخل بيهم كلية الطب و في سنة تالتة تعنتوا معاه لإنه كان بيخوض بطولة العالم للشباب أثناء فترة الامتحانات، واضطر يعيد السنة.

وفعلا عادها و اتخرج وبعدها قرر انه يكمل ورا شغفه وموهبته وهي لعبة الشطرنج استقال من وزارة الصحة وترك مهنة الطب عشان يتفرغ للشطرنج اللي هو موهوب فيه من صغره.

🔴 الجراند ماستر المصري..ولا للتجنيس

باسم أمين حاصل على الجراند ماستر والسوبر جراند ماستر اتعادل مع المصنف الأول عالميًا (ماغنوس كارلسن) في 2019 ، فاز على المصنف التاني والتالت والرابع، وكسب بطل العالم السابق مرتين.

اتعرض عليه التجنيس لأمريكا رفض و بيلعب باسم مصر ببلاش، من غير مكافآت، بدون راتب، بيلاعب أبطال العالم اللي عندهم: مدرب، مساعد شخصي، اخصائي بدني، فريق عمل كامل، وباسم حتى معندوش مدرب.

مع العلم إن باسم أغلب بطولاته الكبيرة والعالمية خاضها بدون مدرب وكان بيسافر البطولات على نفقته الشخصية، والإعلام مش مهتم ومش مركز ومش عارفين نحتفي بالبطل اللي تصنيفه رقم 33 علي العالم.

باسم امين أسطورة مصرية حية في لعبة الشطرنج وقدر يرفع راية واسم البلد في محافل دولية وفي مسابقات في لعبة مكناش متفوقين فيها.

🔴 بطولات تتوالى

وفي السنة اللي فاتت ٢٠٢٢ باسم قدر يحقق عدد كبير من البطولات ابرزهم كانت بطولة أفريقيا فردى رجال للمرة السادسة بنيجيريا واللي اتأهل بعدها لكأس العالم ٢٠٢٣ وبطولة كأس الأندية أبطال أوروبا بالنمسا والفوز بذهبية أفضل أداء على الطاولة ٣ و فضية الفريق.

ومع بداية السنة الجديدة وبعد ٥ ايام بس في ٢٠٢٣ البطل باسم امين فاجئ الجميع بانجاز جديد وهو الفوز بالميدالية الذهبية في بطولة السويد المفتوحة للشطرنج الخاطف♟️🥇

باسم امين حاليًا هو أول مصري وأفريقي يحصل على لقب السوبر جراند ماستر وده أعلى ألقاب لعبة الشطرنج علي مستوي العالم وكذلك هو أول مصري وأفريقي يدخل تصنيف أفضل 100 لاعب في الشطرنج بتحقيقة المركز ال 33 علي مستوي العالم.

🔴 الدعم واجب!

ادعموا باسم والأبطال الرياضيين اللي زيه لأنهم فعلًا هما اللي يستحقوا الدعم وهما اللي يستحقوا يكونوا تريند وهما اللي لازم يكونو واجهة مشرفة لبلدنا لانهم هما واللي زيهم من علماء ومبدعين ومبتكريين وغيرهم اللي يليق بيهم إنهم يحملوا راية مصر وكلمة "مصري" ويظهروها للعالم وهيا مكللة بإنجازات عظيمة تعكس قيمة وعراقة البلد دي وأهلها.

كل الدعم ل GM Bassem Amin في المواجهات القادمة وبننتظر منك انجازات اكتر واكتر يا بطل..وشكرًا لأهل باسم إنهم دعموه ومكّنوه ومكنوش عائق قصاد موهبته ❤️🇪🇬


رااااااائعة ياسر يسلمو اديك نعم لو تلقى باسم أمين دعما يساوي ربع ما تلقى كارلسون و غيرهم من العشرة الأوائل ع العالم من دعم لكان بطل العالم حتى عام 5000 م و لكان كارلسون يدخل مدرسة باسم امين بفخر و اعتزاز و انتقل كارلسون الى لعبة الطميمة و جلي الجليات بمطبخ ياسمينوفا ههههههههههههه


فرحنا وابتهجنا وطرنا من الفرح عندما حقق المنتخب المغربي المركز الرابع بكاس العالم وافتخرنا بان فريق عربي عربي عربي حقق المركز الرابع فنتمنى بان نرى باسم امين وآخرين يعتلون قمه العالم وقادرين على ذلك بقدرة الله ثم ب اصرارهم وجهدهم ولا ننسى محمد شحاته ((((( لـــكـــي الــلــه يــامــصــر ))))) هو احد الابطال ونأمل من له صله ب لكي الله يامصر التواصل معه حيث الموقع محتاج لامثال هؤلاء الابطال فسيروا وعين الله ترعاكم .ــــــــــــــــــــــــــــــــــــــــــــــــــــــــــــــــ

اجب

سجل دخولك للاجابة